بۇگىن «قازمەديا ورتالىعى» عيماراتىندا اقپارات جانە كوممۋنيكاتسيالار ءمينيسترى داۋرەن اباەۆ ارگەنتينانىڭ قوعامدىق پىكىر جانە بۇقارالىق اقپارات فەدەرالدى جۇيەسى ءمينيسترى ە.لومبارديمەن كەزدەستى.
كەزدەسۋ بارىسىندا ىنتىماقتاستىق تۋرالى مەموراندۋمعا قول قويىلدى. ارگەنتينانىڭ قوعامدىق پىكىر جانە بۇقارالىق اقپارات فەدەرالدى جۇيەسى ءمينيسترى ە.ءلومبارديدىڭ ايتۋىنشا, مەموراندۋم ەكى ەلدىڭ اراسىندا اقپارات الماسۋعا جانە جۋرناليستەر دايىنداۋعا مۇمكىندىك بەرەدى. ودان سوڭ ارگەنتينالىق قوناقتار «قازمەديا ورتالىعى» عيماراتىن ارالاپ, ەلىمىزدىڭ ەڭ ءىرى ارنالارىنىڭ جۇمىسىمەن تانىسىپ, روبوتتاندىرىلعان ستۋديانىڭ تۇساۋكەسەرىنە قاتىستى.
قازاقستان مەن ارگەنتينا رەسپۋبليكاسى اراسىنداعى ديپلوماتيالىق قاتىناس 1993 جىلدىڭ 25 ماۋسىمىندا ورناتىلعان. سول ۋاقىتتان بەرى ەكى ەل اراسىندا ساۋدا-ساتتىق پەن مادەني-گۋمانيتارلىق الاڭدا بىرقاتار ماڭىزدى قۇجاتتارعا قول قويىلعان. ارگەنتينا - ەكسپو-2017 كورمەسىنە قاتىسۋشى ەل. مينيستر ە.لومباردي ارگەنتينانىڭ ەكسپو-داعى كوميسسارى. ارگەنتينانىڭ كورمەدەگى ۇلتتىق كۇنى 23 شىلدەگە جوسپارلانعان. بۇل شاراعا قر اقپارات جانە كوممۋنيكاتسيالار ءمينيسترى داۋرەن اباەۆ تا قاتىسادى دەپ كۇتىلۋدە.
«قازاقستان مەن ارگەنتينانىڭ بىرىگىپ جۇمىس ىستەۋدە ءوزارا ۇيرەنەرى كوپ. قازاقستاننىڭ تۇسىرگەن دەرەكتى فيلمدەرى مەن جوبالارى ءبىزدىڭ كورەرمەنگە قىزىق بولادى دەپ ويلايمىن. سونىمەن قاتار, كەلىسسوزدەر اياسىندا سپورتتىق شارالاردى بىرلەسە كورسەتەتىن بولدىق. ال ەكسپو-2017 كورمەسىنە قاتىسۋعا مۇمكىندىك بەرگەن قازاقستانعا ەرەكشە العىس ايتامىز. ارگەنتينا پاۆيلونىنا كەلىڭىزدەر», دەدى ەرنان لومباردي.
راۋان قايدار, «ەگەمەن قازاقستان»
سۋرەتتەردى تۇسىرگەن
ورىنباي بالمۇرات, «ەگەمەن قازاقستان»